මාතලේ නගරාධිපති ඉවත් කිරීම නීති විරෝධීයි.. ආණ්ඩුකාරට බලයක් නෑ..

පුවත්පත් නිවේදනය මාතලේ නගරාධිපති ඩල්ජිත් අළුවිහාරේ ඉවත් කිරීමේ ක්‍රමවේදය නීති විරෝධියි ආණ්ඩුකාරවරයා බලය ඉක්මවා කටයුතු කිරීම හෙළා දකිනවා - මාතලේ මන්ත්‍රීණි රෝහිණී කවිරත්න මධ්‍යම පළාත් ආණ්ඩුකාරවරයා විසින් මාතලේ මහ නගර සභාවේ නගරාධිපති ඩල්ජිත් අළුවිහාරේ ධුරයෙන් ඉවත් කර ගැසට් නිවේදනයක් නිකුත් කර ඇත. මෙම ගැසට් නිවේදනය නිකුත් කිරීම සඳහා මධ්‍යම පළාතේ ප්‍රඥප්ති ප්‍රකාර බලයක් ආණ්ඩුකාරවරයා වෙත නැත. ඔහු පැහැදිලි ලෙසම සිය බලය ඉක්මවමින් කටයුතු කර ඇත. අද වන විට එජාපයට බලය හිමි වත්තල මාබෝල සහ ‘සෞභාගයේ දැක්ම‘ ආණ්ඩුවට බලය ඇති මාවනැල්ලේ ද මෙලෙසම පළාත් පාලන ආයතන ප්‍රධානීන් ආණ්ඩුකාරවරුන් විසින් ඉවත් කර ඇත. මෙයට විරුද්ව කටයුතු කිරීමට එජාපය විසින් පැහැර හැර තිබීම කණගාටුවට කරුණකි. දේශපාලන උවමනාවන් මත, මධ්‍යම පළාත් ආණ්ඩුකාර ලලිත් යූ. ගමගේ මහතා ගෙන ඇති අත්තනෝමතික හා නීති විරෝධී ක්‍රියාකලාපය පිළිබඳ මාගේ දැඩි විරෝධය පළ කරමි. රෝහිණී කවිරත්න මාතලේ දිස්ත්‍රික් පාර්ලිමේන්තු මන්ත්‍රීනි